غازی علم دین شہیدؒ

بحثیت مسلمان اللہ کے حبیب ﷺ سے محبت ایمان کی شرط ِ اوّل ہے۔ دنیا بھر میں آپ ﷺ سے عشق کرنے والے اور ناموس رسالت کے تحفظ کیلئے اپنی جانیں قربان کرنے والے عاشقان رسولﷺ ہر دور میں دنیا کے ماتھے کا جھومر رہے ہیں۔ یہ وہ عظیم مرد مجاہد ہوتے ہیں جو اللہ کے حبیب ﷺ کی محبت میں اپنی جانیں قربان کرکے ہمیشہ کے لئے امر ہو جاتے ہیں۔

غازی علم دین شہیدؒ بھی انہی مرد مجاہدوں میں سے ایک ہیں جنہوں نے گستاخ رسول ہندو راجپال کو جہنم واصل کرتے ہوئے جامِ شہادت نوش فرمایا۔ غازی علم دین شہیدؒ ایسے مجاہد ہیں جن کے نام کے ساتھ غازی بھی لگتا ہے اور شہید بھی۔

غازی علم دین شہیدؒ 4 دسمبر 1908ء بروز جمعرات اندرون شہر لاہور میں طالح محمد کے گھر پیدا ہوئے جو پیشے کے اعتبار سے بڑھئی تھے۔ روایت ہے کہ علم دینؒ ابھی ماں کی گود میں ہی تھے کہ ایک دن کوئی سوالی انکے دروازے پر آیا تب آپؒ کی والدہ نے آپؒ کو اٹھائے ہوئے دروازہ کھولا تو اس فقیر کی نظر آپ پر پڑی تو انہوں نے کہا کہ ’’تیرا یہ بیٹا بڑے نصیب والا ہے، اللہ نے تم پر بہت بڑا احسان کیا ہے تم اس بچے کو سبز کپڑے پہنایا کرو۔اور اس فقیر کی بات درست ثابت ہوئی۔

علم دین نے اپنی ابتدائی تعلیم محلے کے مدرسے حاصل کی مگر تعلیمی سلسلہ زیادہ دیر جاری نہ رکھ سکے اور والد کے ساتھ انکے کام پر لے جانے لگے ۔اور جب آپ جوان ہوئے تو ماموں کی بیٹی سے آپکی منگنی کر دی گئی۔ انہی دنوں ایک ہندو پبلشرمردود راجپال نے حضور اقدسﷺ کی شانِ مقدس میں گستاخی کرتے ہوئے ناقابلِ برداشت خیالات پر مبنی کتاب شائع کی، جس کی اشاعت پر ہندوستان بھر کے مسلمان آگ بگولہ ہوتے ہوئے ماہی بے آب کی طرح تڑپ اُٹھے۔ دو نوجوانوں عبدالعزیز اور اللہ بخش نے بدبخت راجپال کو جہنم واصل کرنے کی کوشش کی مگر ناکام رہےاور عدالت نے حملہ کرنے کے جرم میں دونوں کو سخت سزائیں دیں، انگریزوں کی حکومت تھی، انگریز اور ہندو مسلم دشمنی کی بنا پر ایک ہی ڈگر کے مسافر تھے انہوں نے مردود راجپال کے تحفظ کے لئےپولیس تعینات کر دی۔اانہی دنوں مولوی نور الحق مرحوم (جو اخبار ’’مسلم آؤٹ لک‘‘ کے مالک تھے) نے اخبار میں راجپال کے خلاف لکھا تو اُنہیں بھی دو ماہ کی سزا کے ساتھ ایک ہزار روپیہ جرمانہ کیا گیا۔

مسلمانوں کے جذبات بری طرح مجروح ہوئے تھے اور وہ جگہ جگہ احتجاج اور مظاہرے کر رہے تھے، جلسے جلوس اور اخبارات میں بھی راجپال کے خلاف لکھا جا رہا تھا۔ ،غالباً 31 مارچ یا یکم اپریل تھا کہ غازی علم دین شہیدؒ نے اپنے بڑے بھائی شیخ محمد دین کے ساتھ ایک جلسہ میں نوجوان مقرر کو سُنا، جو راجپال اور اُس کی کتاب کا ذکر کرتے ہوئے مسلمانوں کے دکھ کا اظہار کر رہا تھا اور مسلمانوں کو بیدار کر رہا تھا کہ جاگو مسلمانو جاگو! بد بخت راجپال واجب القتل ہے، ناموسِ رسالت کے تحفظ کے لئے اپنی جانیں قربان کر دو‘‘۔

تقریر کے ان سنہری الفاظ نے علم دین شہیدؒ کے قلب و روح میں ایک ہلچل سی مچا دی، ان الفاظ کی گونج لئے ہوئے گھر پہنچے اور گستاخِ رسول کو قتل کرنے کا عہد کیا۔

علم دین نے 6 اپریل 1929ء کو انار کلی سے ایک چھری خریدی اور اُسے خوب تیز کروا کر عشرت پبلشنگ ہاؤس کے سامنے واقع دفتر پہنچے کہ راجپال بھی اپنی کار میں وہاں آ گیا، بدبخت راجپال کو دیکھتے ہی علم دینؒ کی آنکھوں میں خون اُتر آیا، راجپال کی حفاظت کے لئے حکومت نے پولیس تعینات کر رکھی تھی لیکن اس وقت راجپال کی ہر دوار یاترا سے واپسی کی اطلاع نہ ہونے کی وجہ سے پولیس اہلکار حفاظت کیلئے ابھی نہیں پہنچے تھے۔

راجپال اپنی کرسی پر بیٹھتے ہوئے اپنی آمد کی اطلاع دینے کیلئے فون کرنے کا سوچ ہی رہا تھا کہ عظیم مردِ مجاہد غازی علم دینؒ دفتر کے اندر داخل ہوگئے، اُس وقت راجپال کے دو ملازم کیدار ناتھ اور بھگت رام موجود تھے لیکن اُن دونوں کی موجودگی علم دین کے جذبے کے آگے بے دم ہو کر رہ گئی اور اُنؒ کی کامیابی کی راہ میں رکاوٹ نہ بن سکی، علم دینؒ نے چھری کے پے در پے وار کرتے ہوئے بدبخت راجپال کو جہنم واصل کر دیا، بعد میں علم دین کو گرفتار کر لیا گیا اور دفعہ 302 کے تحت مقدمہ درج کیا گیا۔

غازی علم دین شہیدؒ کے خلاف 10 اپریل ساڑھے دس بجے مسٹر لوائسٹ ایڈیشنل ڈسٹرکٹ مجسٹریٹ کی عدالت میں مقدمہ کی سماعت شروع ہوئی، استغاثہ کی طرف سے ایشر داس کورٹ ڈی ایس پی پیش ہوا، جبکہ علم دینؒ کی طرف سے مسٹر فرخ حسین بیرسٹر اور خواجہ فیروز الدین بیرسٹر رضا کارانہ طور پر پیش ہوئے اور اُن کی معاونت کیلئے ڈاکٹر اے آر خالد نے اپنی خدمات سر انجام دیں۔

عوامی احتجاج کے باوجود 22مئی 1929ء کو سیشن جج لاہور نے علم دینؒ کو سزائے موت کا حکم سنایا، 15 جولائی کو غازی علم دینؒ کو سنائی جانے والی سزا کے خلاف ہائی کورٹ میں اپیل دائر کر دی گئی، جس کی سماعت جسٹس براڈ وے وجسٹس جانسن نے کی اور 17 جولائی کو یہ اپیل خارج کر دی گئی جس کے خلاف پیروی کونسل میں کوشش کی گئی، جو 15 اکتوبر کو خارج ہوگئی اور غازی علم دین شہیدؒ کی سزائے موت بحال ہی رہی۔

مسلمانوں نے ہائی کورٹ میں علم دین کے مقدمہ کی پیروی کے لئے قائد اعظمؒ کی خدمات بھی حاصل کیں، قائد اعظم کا یہ خیال تھا کہ اگرغازی علم دینؒ اپنے جرم سے انکار کر دیں تو مقدمہ کافی حد تک کمزور اور قابلِ بریت ہو سکتا ہے لیکن علم دین شہید نے کسی ایسی تجویز پر عمل کرنے سے یکسر انکار کر دیا اور کہا کہ میں کیسے کہ دوں کہ یہ قتل میں نے نہیں کیا جبکہ مجھے اس قتل پر فخر ہے۔

کہا جاتا ہے اس سلسلہ میں نمائندہ وفد نے علامہ اقبالؒ سے رابطہ کیا اور درخواست کی کہ علم دین شہید کو اپنے اقبالِ جرم سے انحراف کی ترغیب دیں لیکن علامہ اقبال ؒ نے وہ تاریخی جملہ کہا جو آج بھی عاشقانِ رسولﷺ کے کانوں میں گونجتا نظر آتا ہے کہ ’’اَسی گلاں ای کردے رہ گئے تے بازی ترکھان دا پتر لے گیا‘‘، مزید فرمایا کہ ’’ وہ علم دین شہید ؒ کو اس عظیم اعزاز سے محروم کرنے کا مشورہ کیسے دے سکتے ہیں‘‘۔

اپیل خارج ہونے پر مسلمانوں میں سخت اشتعال پھیل گیا اور لاہور میں فساد کے خطرے کے پیش ِنظر 3 اکتوبر 1929ء کو غازی علم دینؒ کو رات تقریباً ساڑھے نو بجے گوجرانوالہ اور وہاں سے بذریعہ ریل گاڑی میانوالی روانہ کیا گیا، میانوالی جیل میں موجود عملہ اور قیدی غازی علم دینؒ کو قدر کی نگاہ سے دیکھتے تھے، آپؒ کی نگرانی پر نواب دین سپاہی تعینات تھا، سپاہی کہتا ہے کہ میں نے نگرانی کے دوران حیرت انگیز واقعات دیکھے ہیں۔

عموماً پھانسی پانے والے قیدیوں کا وزن کم ہو جاتا ہے اور کُرتے ڈھیلے ہو جاتے ہیں مگر جیل کے عملہ کا کہنا تھا کہ غازی علم دینؒ کا وزن بڑھ گیا تھا اور کُرتے تنگ ہو جاتے تھے، اس کے علاوہ غازی علم دینؒ کے ہاتھوں سے ’’نور‘‘ کی شعائیں بھی پھوٹتی ہوئی نظر آئیں، غازی علم دینؒ نے سپرنٹنڈنٹ جیل کو آخری وصیت لکھوائی، جس میں وارثان کو اسلامی احکامات کی پابندی کی تلقین کی اپنے لباس و دیگر اشیاء رشتہ داران کو دینے کی ہدایات صادر فرمائیں۔

پھر 31اکتوبر 1929ء کا دن اُمت مسلمہ کیلئے بڑا رنجیدہ اور غمگین تھا، جبکہ غازی علم دینؒ کیلئے انتہائی خوشی وشادمانی کا دن تھا، کیونکہ اس دن حرمتِ رسولﷺ پہ قربان ہونیوالے غازی علم دینؒ بارگاہِ رسالت مآبﷺ میں پہنچنے والے تھے، اس رات غازی علم دینؒ نے حسبِ معمول نماز ِتہجد پڑھی، اس کے بعد فجر اور بارگاہِ خداوندِ قدوس میں دعا گو ہی تھے کہ اس دوران داروغہ جیل معہ پولیس گارڈ اور مجسٹریٹ وغیرہ غازی علم دینؒ کو تختہ دار تک لے جانے کیلئے آگئے۔

مجسٹریٹ نے آپؒ سے کہا تیار ہوجاؤ، وہ گھڑی آگئی، یہ خوشخبری سن کر غازی علم دینؒ نے جواباً کہا کہ میں خوشی سے تیار ہوں، آپؒ کو ہشاش بشاش اور خوشی سے چمکتے چہرے کو دیکھ کر مجسٹریٹ حیران رہ گیا، مجسٹریٹ نے آپؒ سے پوچھا کوئی حسرت، کوئی آرزو، کوئی وصیت، آپؒ مسکرائے اور لب کشائی فرماتے ہوئے دو رکعت نفل بطور شکرانہ ادا کرنے کی خواہش کا اظہار کیا اور جلدی جلدی نفل ادا کئے تاکہ موجود لوگ یہ خیال نہ کریں کہ وہ نماز میں دیر پھانسی میں تاخیر کیلئے کر رہے ہیں، نمازِشکرانہ ادا کرنے کے بعد تیز تیز قدم اٹھاتے ہوئے تختہ دار کی جانب چل پڑے، قیدیوں کی بیرکوں کے سامنے سے گزرتے ہوئے قیدیوں کے سلام کے جواب میں آپؒ نے انہیں ’’اللہ حافظ‘‘ کہا تو جیل کا سارا احاطہ نعرہ رسالت ’’یارسول اللہﷺ‘‘ کے فلک بوس نعروں سے گونج اٹھا۔

تختہ دار پر آپؒ کے ہاتھ پاؤں باندھ دیئے گئے، آنکھوں پر سیاہ پٹی اور سر پر سیاہ ٹوپ چڑھا دیا گیا، اس دوران آپؒ نے وہاں موجود لوگوں سے خطاب کرتے ہوئے فرمایا ’’میں نے رحمتِ عالمﷺ کی حرمت کیلئے بدبخت راجپال کو قتل کیا، تم گواہ رہنا کہ میں عشق رسولﷺ میں کلمہ شہادت پڑھتے ہوئے جان دے رہا ہوں‘‘، آپؒ نے کلمہ شہادت بلند آواز میں پڑھا اور پھانسی کے پھندے کو بوسہ دیا اور پھر آپؒ کے پاؤں کے نیچے سے تختہ کھینچ لیا گیا اور چند ہی لمحوں میں آپؒ کی روحِ قفس عنصری سے پرواز کرتے ہوئے ربِ کریم کے حضور پہنچ گئ۔

غازی علم دین شہیدؒ نے وصیت فرمائی تھی کہ انہیں میانی صاحب لاہور میں دفن کیا جائے، مگر انگریزوں کا خیال تھا کہ اگر وصیت کے مطابق عمل درآمد کرتے ہوئے میت لاہور بھیجی گئی تو میانوالی شہر سے لے کر لاہور تک کے تمام مسلمان، لاہور پہنچ جائیں گے اور ہندو مسلم فساد کھڑا ہو جائے گا جسے روکنا مشکل، بلکہ ناممکن ہو جائے گا، ان خدشات کے پیشِ نظراس وقت کے گورنر پنجاب ڈی ماؤنٹ مورنسی نے ہدایت جاری کر دی کہ غازی علم دینؒ کو میانوالی ہی میں قیدیوں کے قبرستان میں دفن کر دیا جائے۔
غازی علم دین شہیدؒ کو میانوالی میں دفنائے جانے پر مسلمانوں میں غم و غصہ کی شدید لہر دوڑ گئی، قریب تھا کہ بہت بڑا فساد کھڑا ہوتا، وقت کی نزاکت کو بھانپتے ہوئے علامہ محمد اقبالؒ، سر محمد شفیع، مولانا غلام محی الدین قصوری، میاں عبدالعزیز اور دیگر احباب نے وفد کی صورت میں گورنر پنجاب سے ملاقات کرتے ہوئے میت کی حوالگی اور اسے لاہور میں دفن کرنے کا مطالبہ پیش کیا، گورنر پنجاب نے امن کے پیشِ نظرچند شرائط پیش کیں، جس کی ذمہ داری وفد کے اراکین نے قبول کی۔

پھر 13 نومبر 1929ء کو غازی علم دین شہیدؒ کی میت قبر کشائی کروا کر نکلوائی گئی جو اسی طرح خوشبوؤں سے معطر اور تروتازہ تھی، جسد ِمبارک کیلئے تابوت سید مراتب علی شاہ نے اپنی نگرانی میں تیار کروایا، شہیدؒ کا جسدِ مبارک 13 نومبر کو بذریعہ ٹرین ساڑھے 4 بجے دوپہر میانوالی سے لاہور چھاؤنی کے ریلوے سٹیشن پر تقریباً صبح ساڑھے 5 بجے پہنچا، جسے سنٹر جیل کے حکام نے تقریباً پونے 7 بجے حضرت علامہ محمد اقبالؒ اور سر محمد شفیع وغیرہ کے سپرد کر دیا۔

نومبر14 کو تقریباً ساڑھے 10 بجے قاری محمد شمس الدین خطیب مسجد وزیر خان نے نمازِ جنازہ پڑھانے کی سعادت حاصل کی۔ اور غازی علم الدین شہید کو میانی صاحب میں سپرد خاک کر دیا گیا۔ اتنے سال گذر جانے کے باوجود انکی قبر پر عقیدت مند فاتحہ خوانی کرنے آتے ہیں۔

میری آپ سب سے درخواست ہے کہ اپنے بچوں کو غازی علم دین شہیدؒ جیسی شخصیات کے بارے میں ضرور پڑھائیں تاکہ انکے اندر جذبہ ایمانی پیدا ہو۔ اور جب بھی لاہور جائیں تو غازی علم دین شہیدؒ کی قبر پر جا کر فاتحہ ضرور پڑھیں۔